About Me

My photo
சாதாரணமானவன் தான் ஆனால் ஏதாவது சாதிக்க வேண்டும் என்று மனதில் எப்போதும் நினைப்பவன்.

Sunday, April 23, 2017

புதைக்கப்படும் உண்மைகள் - மின்னூல் - மதிப்புரை

அன்புடையீர்,

அனைவருக்கும் என் பணிவான வணக்கங்கள். 

சமீபத்தில் ‘ஊஞ்சல் வலைப்பதிவர்’ திருமதி. ஞா. கலையரசி அவர்கள் எனக்கு இரு சிறுகதைத்தொகுப்பு மின்னூல்களை [1. புதைக்கப்படும் உண்மைகள், 2. புதிய வேர்கள். ] அன்பளிப்பாக அனுப்பிவைத்து, எனக்கு அவற்றைப் படிக்க வாய்ப்பு அளித்துள்ளார்கள்.  


 

 

 11.10.2015 புதுக்கோட்டையில் நடந்த
வலைப்பதிவர் திருவிழா மேடையில்
பரிசு பெறும் வலைப்பதிவர் 
திருமதி. ஞா. கலையரசி அவர்கள்

இவ்வாறு தன் மின்னூல்களை எனக்கு அன்பளிப்பாக அளித்து படிக்க வாய்ப்பளித்துள்ள திருமதி. ஞா. கலையரசி அவர்களுக்கு முதற்கண் என் அன்பு நன்றிகளைத் தெரிவித்துக்கொள்கிறேன். 

  ’புதிய வேர்கள்’  
மின்னூல் பற்றி என்னுடைய கருத்துக்களை 
ஏற்கனவே சென்ற பதிவினில் வெளியிட்டிருந்தேன்.
அதற்கான இணைப்பு:

http://gopu1949.blogspot.in/2017/04/blog-post_21.html




இப்போது
என் பார்வையில்
’புதைக்கப்படும் உண்மைகள்’ 
 மின்னூல் 


இதிலும் மொத்தம் பத்து கதைகள் இடம் பெற்றுள்ளன. (1) அன்னையர் தினம் (2) உண்ணாவிரதம் (3) உறவுகள் (4) ஒரு சொட்டுக் கண்ணீர் (5) செயல் வீரன் (6) தண்டனை (7) தீபாவளி உடை - தலைமுறை இடைவெளி (8) நம்பிக்கை (9) புதைக்கப்படும் உண்மைகள் (10) பெண்ணெனும் இயந்திரம்.





அன்னையர் தினம்:

10.12.2012 வல்லமையில் வெளிவந்துள்ளது.

அன்னையர் தினம் என்பது இதன் தலைப்பாகினும், இதில் வரும் தந்தையர் கதாபாத்திரம் படிக்கும் நம் நெஞ்சில் நிற்பதாக உள்ளது.



உண்ணாவிரதம்


23.11.2009 தமிழ் மன்றத்தில் எழுதியுள்ள கதை இது.

நகைச்சுவை நையாண்டிகளுடன், அரசியல்வாதிகளின் பித்தலாட்டங்களும் தோலுரித்துக் காட்டப்பட்டுள்ளன.  

ரஸித்துச் சிரித்து மகிழ வேண்டிய கதை. வரிக்கு வரி நகைச்சுவையும் அரசியல் கோமாளித்தனங்களும் தூக்கலாக அமைந்துள்ளன. 




உறவுகள்


நெருங்கிய உறவுகள் என்று சொல்லிக்கொண்டும், நினைத்துக்கொண்டு இருப்பவர்கள், உண்மையில் ஏதேனும் ஒரு நெருக்கடி நிலை அல்லது ஆபத்து என்றால் ஓடி வந்து உதவிடுவார்களா அல்லது ஓடி ஒளிந்து தப்பித்து விடுவார்களா  என்பதை உணர்வு பூர்வமாகச் சொல்லிச்செல்லும் கதை இது. 

படிக்கும்போதே மிகவும் உருக்கமாகவும், மனதுக்கு வருத்தமாகவும் உள்ளது.  உலக யதார்த்தங்களை மிகவும் அருமையாக எடுத்துச் சொல்லியுள்ளார்கள். 







ஒரு சொட்டுக் கண்ணீர்

‘ஒரு சொட்டுக் கண்ணீர்’ கதையின் இறுதி வரிகளைப் படிக்கும்போது நம் கண்ணில் ஒரு சொட்டுக் கண்ணீரை வரவழைத்து விடும் என்பதில் சந்தேகமே இல்லை. பல பெண்களில் வாழ்க்கை இந்தக் கதையின் கதாநாயகி போலவே அர்த்தமில்லாமல் போய் விடுகிறது. 

அவரவரவர் மனசாட்சிக்கு மட்டுமே எது நியாயம், எது அநியாயம் என்பது தெரியும். 

வதந்திகளைப் பரப்புவதும், அதனை பத்திரிகையில் செய்தியாகப் போடுவதும் சம்பந்தப்பட்ட பெண்ணை எப்படியெல்லாம் அழ வைக்கும் என்பதை உணர முடிகிறது. ஊர் வாயை நாம் எப்படி மூடுவது? 

இதுபோன்று கொடுமையான ஒரு கணவர் இருப்பதற்கு இல்லாமலேயே இருக்கலாம்தான். 

’செத்தும் கெடுத்தான் சீதக்காதி’ என்பதற்கு உதாரணமாக கதாநாயகனை வடிவமைத்துள்ளார்கள்.



செயல் வீரன்


சமுதாய சிந்தனையுடன் வெகு அழகாகவும் கச்சிதமாகவும் எழுதப்பட்டுள்ள கதை இது.






தண்டனை


ஜனவரி 2012 உயிரோசையில் எழுதப்பட்டுள்ள கதை இது. 

படிப்போர் மனதை மிகவும் கலங்க வைக்கும் கதை. 

ஜாதி வெறிகள் அடங்கி, திருட்டு-கொலை-கொள்ளை-வன்முறை-கற்பழிப்புகள் இல்லாத நல்லதொரு சமுதாயம் வளர வேண்டும். மனிதமனங்கள் மாற வேண்டும். 

எங்கும் மனிதாபிமானம் வளர வேண்டும் என்பதை வலியுறுத்தியும், தாயுள்ளங்களின் தவிப்பும், மன்னித்தல் என்ற மாண்பும் கதையில் மிகவும் ஆழமாகச் சொல்லப்பட்டுள்ளன. 




தீபாவளி உடை  

தலைமுறை இடைவெளிகளைப் பற்றி மிகவும் யோசித்து வெகு அருமையாக எழுதப்பட்டுள்ள கதை இது. படிக்க நகைச்சுவையாகவும் உள்ளது. 


  
  

தற்கால இளம் வயதினர் தங்கள் உடைகளுக்குக் கொடுத்து வரும்  முக்கியத்துவம்,  பொறுப்பில்லாமல் இருப்பதாக, மிகவும் பொறுப்புடன் சொல்லியுள்ளார்கள். 

படிக்க, வேடிக்கையாகவும் தமாஷாகவும் உள்ளது. 



நம்பிக்கை

நம்பிக்கை என்ற இந்த சிறுகதை, தன்னம்பிக்கையில்லாத சில இளைஞர்களுக்கு நிச்சயமாக தன்னபிக்கையூட்டும் வகையில் தகுந்த சிறு உதாரணங்களுடன் எழுதப்பட்டுள்ளது. அனைவரையும் சிந்திக்கவும் யோசிக்கவும் வைப்பதாக உள்ளது.



புதைக்கப்படும் உண்மைகள்

அக்டோபர் 2011 உயிரோசையில் வெளிவந்துள்ள மிகச்சிறப்பான கதை இது. தலைப்புத் தேர்வும் ... நூலுக்கு இதையே தலைப்பாகக் கொடுத்துள்ளதும் மிகவும் பொருத்தமாகவே உள்ளன.

உலகில் ஏழைகள் படும் எண்ணற்ற வேதனைகளையும், பசிக் கொடுமைகளையும், அரசியல்வாதிகள் செய்யும் அராஜகங்களையும் படிப்போர் மனதினை உருக்கும் விதமாக எழுதியுள்ளார்கள். படிக்கவே மிகவும் சோகமாகவும் வேதனையாகவும் உள்ளது. 





பெண்ணெனும் இயந்திரம்



’பெண்ணெனும் இயந்திரம்’ மிகவும் பொருத்தமான தலைப்பு.

இன்றைய பெண்களுக்குத்தான் எத்தனை எத்தனை பிரச்சனைகள். அனைத்துக் கஷ்டங்களையும், தன் மனதில் சுமந்துகொண்டு, பெரும்பாலானோர் இயந்திரமாகத்தான் செயல் பட்டு வருகிறார்கள். படிக்கவே மனதுக்கு மிகவும் கஷ்டமாக உள்ளது. 

இவளை வேலைக்குப் போகச்சொல்லி நிர்பந்தப்படுத்தியுள்ள கணவனே, இவளின் கஷ்டங்களை உணராமல் இருப்பது கொஞ்சமும் நியாயம் இல்லாமல் படிக்கும் நமக்கே எரிச்சலூட்டுவதாக உள்ளது.  

தனியே இரவினில் வெளியே வேலைக்குச் சென்று வரும் அவள், காலையில் தன்னிடம் என்ன சொல்ல வருகிறாள் என்பதைக்கூட பொறுமையாகக் கேட்டுக்கொள்ள முடியாத கணவன் கதாபாத்திரம் ஆண் என்ற அகம்பாவத்தையும், பொறுப்பின்மையையும், ஆணாதிக்கத்தையும் காட்டுவதாக படைக்கப்பட்டுள்ளது. 

இயற்கையாகவே பெண்களுக்கு பலவித ஆபத்துகள் உள்ளன. அதுவும் வெளியே இரவு வேளையில், வேலை நிமித்தமாகவும், சம்பாத்யம் நிமித்தமாகவும், தனியாகக் கிளம்ப வேண்டியுள்ளது மிகவும் கொடுமை. குழந்தையை வீட்டில் பொறுப்பற்ற கணவனின் பாதுகாப்பினில் விட்டு விட்டுச் செல்வது மேலும் சோகம். கணவன்-மனைவிக்குள் அனுசரிப்பு இல்லாத வாழ்க்கை நிச்சயமாக வெறுத்தே போய்விடும்தான். 

அதனை மிக இயல்பாக எடுத்துச் சொல்லியுள்ளார்கள், இந்தக் கதையில்.





 

இந்த மேற்படி மின்னூலை முழுவதும் ரஸித்து ருசித்துப் படிக்க விரும்புவோர் இதோ இந்த  http://www.pustaka.co.in/home/ebook/tamil/pudhaikapadum-unmaigal இணைப்புக்குப்போய் அதில் உள்ள BUY NOW என்பதைக் கிளிக் செய்தால் போதும். மின்னல் வேகத்தில் உங்களை அந்த மின்னூல் வந்தடையும்.  



வாசிப்பது என்பது சுவாசிப்பது!
வாசிப்பவர்களே சுவாசிப்பவர்கள்!!





இன்று ஏப்ரல் 23  

உலக புத்தக தினம்

வாசிக்க மறந்துடாதீங்கோ!

 

என்றும் அன்புடன் தங்கள்,



Friday, April 21, 2017

புதிய வேர்கள் - மின்னூல் - மதிப்புரை

அன்புடையீர்,

அனைவருக்கும் என் பணிவான வணக்கங்கள். 

சமீபத்தில் ‘ஊஞ்சல் வலைப்பதிவர்’ திருமதி. ஞா. கலையரசி அவர்கள் எனக்கு இரு சிறுகதைத்தொகுப்பு மின்னூல்களை [1. புதிய வேர்கள், 2. புதைக்கப்படும் உண்மைகள்] அன்பளிப்பாக அனுப்பிவைத்து, எனக்கு அவற்றைப் படிக்க வாய்ப்பு அளித்துள்ளார்கள்.  

 


 

இவ்வாறு தன் மின்னூல்களை எனக்கு அன்பளிப்பாக அளித்து படிக்க வாய்ப்பளித்துள்ள திருமதி. ஞா. கலையரசி அவர்களுக்கு முதற்கண் என் அன்பு நன்றிகளைத் தெரிவித்துக்கொள்கிறேன். 

என் பார்வையில் 

புதிய வேர்கள் - மின்னூல்


இதில் மொத்தம் பத்து சிறுகதைகள் இடம் பெற்றுள்ளன. (1) அம்மாவின் ஆசை (2) உண்மை சுடும் (3) ஒரு பல்லின் கதை (4) திருப்பு முனை (5) கொலுசு (6) சாதுர்யம் (7) நாய்க்கடி (8) புதிய வேர்கள் (9) பெண் பார்க்கும் படலம் (10) மூன்று விரல்.


அம்மாவின் ஆசை:

2010 ஜூன் மாதம், தமிழ்மன்ற சிறுகதைப்போட்டியில் முதல் பரிசுக்குத் தேர்வாகியுள்ள மிகவும் அற்புதமான கதை இது. 

வாழ்க்கையில் ஒரு ஸ்டேஜில், நம்மைப்போன்ற நடுத்தர வர்க்கத்தினரின் நியாயமான ஆசைகளை மிகவும் இயல்பாகவும், யதார்த்தமாகவும், அருமையாகவும், அழகாகவும் எழுதியுள்ளார்கள்.


அந்த அம்மாவின் ஆசைதான் என்ன? கடைசியில் அது நிறைவேறியதா? என்பதை மின்னூலை வாங்கி வாசித்துத் தெரிந்துகொள்ளுங்கோ, ப்ளீஸ்.




உண்மை சுடும்:

20.07.2008 தினமணி கதிரில் வெளியாகியுள்ள அருமையான கதை இது. 

கணவர்மார்களில் பெரும்பாலானவர்களுக்குத் தன் மனைவியின் அருமை பெருமைகள் தெரிவதே இல்லை. 


பொதுவாகவே ஒருவர் அருகில் கூடவே நம்முடன் இருக்கும்போது அவரின் அருமை பெருமைகள் நமக்குத் தெரியவே தெரியாது. அவர்கள் நம்முடன் இல்லாதபோது மட்டுமே அதனை நம்மால் நன்கு உணர முடியும் என்பதை மிக அழகாக உணர்த்தி எழுதியுள்ளார்கள்.




ஒரு பல்லின் கதை:

நிலாச்சாரலில் வெளிவந்துள்ள கதை இது. 

படாதபாடு படுத்திய ‘பல்’ ஒன்று பற்றியும், அதற்காக மேற்கொண்ட பல் வைத்தியம் பற்றியும், படிக்கும் போதே பல் கூச்சம் எடுப்பது போல எழுதி அசத்தியுள்ளார்கள்.  




திருப்பு முனை:

தினமணி கதிரில் வெளியாகியுள்ள கதை இது. 

என்னதான் பழைய / பரம விரோதியாக இருப்பினும், அவருக்கு வயதான காலத்தில் நம் வீடு தேடி வந்து ஓர் உதவி என்று கேட்டு நம்மிடம் சரணாகதி அடையும்போது ..... ’இன்னா செய்தாரை ஒருத்தல் அவர் நாண நன்மையும் செய்து விடல்’ ..... என்பதைச் சொல்லும் அழகான கதை.




கொலுசு:

30.11.2008 தினமணி கதிரில் வெளிவந்துள்ள கதை இது. 

தன் சொந்த வாழ்க்கையில் நடந்துள்ள ஓர் உண்மைச் சம்பவத்தையே கதையாக்கி இருப்பார்கள் போலிருக்குது. அதனால் இந்தக் கதையினில் நல்லதோர் உயிரோட்டம் என்னால் உணரப்படுகிறது.





ஒரு பெண் தன் கால்களில், புதுசாகக் கொலுசு அணிந்து பள்ளிக்குச் சென்றால் அது ஒரு தனி அழகாக இருப்பதுடன், அதன் இனிய ஒலி பிறரின் கவனத்தைக் கவர்ந்து பாராட்டுக்களைப் பெற்றுத்தரும். 

அதே பெண் தன் ஒரு காலில் கொலுசு இல்லாமல் பள்ளியிலிருந்து வீடு திரும்பினால், ஆசையுடன் புது கொலுசு வாங்கிக்கொடுத்துள்ள பெற்றோர்களின் கவனத்தைக் கவர்ந்து திட்டோ அல்லது அடியோ பெற்றுத்தரும்.  

பழி ஓரிடம் ... பாவம் ஓரிடமாக இந்தக்கதையின் போக்கு சற்றே வித்யாசமாக போகிறது. 

தொலைந்து போன அந்த ஒற்றை கொலுசு எங்கே? 

இந்த மின்னூலை வாங்கிப்படித்தால் நீங்களும் தெரிந்துகொள்ளலாமே!    






சாதுர்யம்:

5.10.2008 தினமணி கதிரில் வெளியாகியுள்ள கதை இது.  


ஒரு சர்வாதிகாரியான மாமியார். அவளுக்கு அடுத்தடுத்து பல மருமகள்கள். கடைசியாக வந்து சேர்கிறாள் ஒரு அல்ட்ரா மாடர்ன் மருமகள். இந்தக் கதையின் சுவாரஸ்யத்திற்குக் கேட்கவும் வேண்டுமோ !  நீங்களே படித்துப் பாருங்கோ, ப்ளீஸ்.



நாய்க்கடி:

இது நிலாச்சாரலில் வெளியாகியுள்ள கதை. 

கதையில் நகைச்சுவை தூக்கலாக உள்ளது. அந்த நாயை (நாய்க் கதையை) இன்னும் கொஞ்சம் ஓட விட்டிருக்கலாமோ என நம்மை நினைக்க வைக்கும் சிரிப்பான கதை. 




புதிய வேர்கள்:

இந்தக்கதையின் தலைப்புத் தேர்வு மிகவும் அருமை. நூலுக்கும் இதனையே தலைப்பாகக் கொடுத்துள்ளது தனிச்சிறப்பாக உள்ளது. 

நவரசங்களும் ஒருங்கே அமைந்துள்ள மிக அழகான + இயல்பான + யதார்த்தமான குடும்பக்கதை இது, 

நன்கு முன்னேறிய வெளிநாட்டு வழுக்கும் சாலைகளில், மிக ஒஸ்தியான காரில், அலுங்காமல் குலுங்காமல் சுகமான பயணம் மேற்கொள்வது போல உள்ளது .... இந்த ஒரு கதையை வாசிக்கும் போது.

கதாநாயகி சொல்லும் கதையின் நிறைவு வரிகளான ‘எனவே இன்றைய தினத்தை நான் மகிழ்ச்சியாகக் கழிப்பேன்’ என்பது நம் அனைவரையும் சிந்திக்க வைப்பதாகும். 




பெண் பார்க்கும் படலம்:

6.7.2009 நிலாச்சாரலில் வெளி வந்துள்ள கதை இது. 

வரிக்கு வரி நகைச்சுவை மிகவும் தூக்கலாக இருப்பதால் எனக்கு மிகவும் பிடித்துப்போனது இந்தக்கதை. 

கோதுமை மாவில் அசோகா என்ற பெயரில் பெண் வீட்டார் செய்து சாப்பிடக் கொடுத்திருந்த ஸ்வீட் தன் வாயின் மேல் அன்னத்தில் ஈஷிக்கொண்டிருக்க, அத்துடனேயே மிகவும் கஷ்டப்பட்டு “உங்கள் பெண்ணுக்கு ஆடத்தெரியுமா? பாடத்தெரியுமா? சமைக்கத்தெரியுமா?” என பிள்ளையின் அம்மா கேட்க, பெண்ணின் அப்பா சொன்ன அதிரடியான பதில்களைப் படித்த எனக்கு, சிரித்த சிரிப்பில் என் விலா எலும்புகள் சுளுக்கிக்கொண்டு விட்டன.



மூன்று விரல்:

உயிரோசை இணைய இதழில் வெளியாகியுள்ள கதை இது. 

இந்தக் கதையும் நல்ல நகைச்சுவையாகவும், த்ரில்லிங்காகவும், சஸ்பென்ஸ் ஆகவும் எழுதப்பட்டுள்ளது. மூட நம்பிக்கைகளுக்கு எதிராகவும் இந்தக் கதை அமைந்துள்ளது. உறவுகளின் போக்கினையும், உலக யதார்த்தங்களை அப்படியே புட்டுப்புட்டு வைக்கும் இந்தக்கதை, படிக்கும் நமக்கும் விறுவிறுப்பாக அமைந்துள்ளது.





 



இந்த மின் நூல் கண்டு ஆகிய கற்கண்டை முழுவதும் ரஸித்து ருசித்துப் படிக்க விரும்புவோர் இதோ இந்த http://www.pustaka.co.in/home/ebook/tamil/pudhiya-vergal   இணைப்புக்குப்போய் அதில் உள்ள 'BUY NOW' என்பதைக் கிளிக் செய்தால் போதும். மின்னல் வேகத்தில் உங்களைத்தேடி அந்த மின்னூல் வந்து சேரும். 

தொடரும்

என்றும் அன்புடன் தங்கள்,